As inscricións honoríficas estaban dedicadas normalmente ao Emperador ou a personaxes imperiais. Como mostra de epigrafía de carácter honorífico procedente de Lucus Augusti, recollemos o testemuño epigráfico de tres monolitos, un deles completamente enteiro, relativos á fundación da cidade. Todos eles levan un texto epigráfico común, que consiste nunha dedicatoria do Legado Paulo Fabio Máximo ao emperador Augusto, fundador da cidade. Grazas á existencia destes epígrafes podemos cifrar a datación de fundación da cidade nos anos 15-13 a.C. Estas inscricións constitúen por outra banda, unha das mostras máis antigas do culto ao emperador no noroeste hispánico.