Monolito fundacional da cidade ofrecido por Paulo Fabio Máximo. Rematado en frontón semicircular e coa base semidesbastada, como para ser enterrada e manter estante o monumento. O texto epigráfico está gravado no tercio superior do monolito. A primeira liña está bastante erosionada, aínda que non tanto como para non poder distinguir claramente un C e un M e, con menos nitidez, un A interposto, o que permite ler con moitas vacilacións [V(rbis)] C (onditori) A(ugusto) M (onumentum), entendendo a última das palabras como feito conmemorativo. O texto reconstruiríase, polo tanto, do xeito seguinte:

[V (urbis)] C (onditori) A (ugusto) M (onumentum) / CAESARI / [P]AVLLVS FABIVS / MAXVMVS / LEGAT(us). CAESARIS

Monumento a Augusto, fundador da cidade, Paulo Fabio Máximo, legado de César, faille esta dedicatoria ao César.