As inscricións votivas ou religiosas, dedicadas ás diversas divinidades,  recóllense nas aras ou altares, normalmente de granito, que adoptan tipos e formas diferentes. A ara tipicamente romana, moldurada segundo os canons clásicos, caracterízase por unha pedra exenta, cunha altura entre 60 e 90 cm, de forma cúbica, con cornixa acrecentada arriba e base saínte, en medio das cales se dispón o campo epigráfico. Na parte superior estaba provista dun focus ou rebaixe circular para recibir as ofrendas de sangue ou líquidos. Dentro deste modelo clásico, existen multitude de variantes, cada unha coa súa peculiaridade, que responden ao traballo dos diferentes obradoiros ou ás demandas dos clientes. No campo epigráfico recóllense as dedicatorias ás diferentes divindades, seguindo unha estrutura moi simple: nome da divindade, dedicante e fórmula final (V.S.L.M. ou EX VOTO).