Son poucas as pezas de escultura en vulto redondo, ben sexa en pedra ou en bronce, e ademais o seu estado de conservación é deficiente para poder apreciar a súa calidade artística. Predomina a estatuaria en pedra, granito ou mármore, e os temas representados móstrannos a vertente culta da arte provincial romana, respondendo a modelos claramente romanos. Isto converte a estas obras en modelos da arte oficial, a diferenza do relevo, onde se pode apreciar a arte popular. Os exemplos de estatuaria en bronce relacionanse con pezas pequenas, vinculadas ó ámbito doméstico, xa que se trata de representacións de divindades protectoras que presidían os lares.