Fragmento de vaso cerámico de importación da produción de paredes finas do taller de Melgar de Tera (Zamora). Bordo curvo, corto, exvasado, con labio redondeado. Corpo ovoide con ombro abombado. Decoración á barbotina, cun friso de grilanda de follas de auga, orientadas a dereita, enmarcadas por dúas liñas de perlas.

As producións de Melgar de Tera están moi ben representadas en Lucus Augusti, sendo as producións de paredes finas maioritarias na cidade. Estes vasos aparecen representados nos contextos da segunda metade do século I d. C. na cidade.