Fragmento de vaso cerámico de importación da produción de paredes finas do taller de Melgar de Tera (Zamora). Bordo curvo, corto, exvasado, con labio redondeado. Corpo ovoide con decoración de fino ruletado, pé anular. Pasta alaranxada, fina e ben decantada.

As producións de Melgar de Tera están moi ben representadas en Lucus Augusti, sendo as producións de paredes finas maioritarias na cidade. Estes vasos aparecen representados nos contextos da segunda metade do século I d. C. na cidade.