Entre as xoias, destacan os exemplares de aneis, usados tanto polos homes como mulleres de Lucus Augusti, e que a súa vez identificaban ó dono e servían para selar documentos, ou mesmo como amuletos. Estos amosan o gusto polas formas variadas e polo emprego de pedras preciosas gravadas (xarda, cornalina, nícolo …), algunhas delas admirables pola beleza do deseño e a finura da talla.

Os motivos que se gravan son moi variados, na súa meirande parte alegóricos ou mitolóxicos, como a representación de Fortuna. Outros motivos, como os animais, podían ter un significado simbólico ou apotropaico (de protección contra os males). Máis raros son os aneis de ouro ou prata, como un exemplar onde se observa a influencia da simboloxía cristiá, co gravado de figuras de peixes.