Anel de bronce, con entalle de pasta vítrea imitando o nícolo, sobre chatón ovalado enmarcado por catro gránulos. O aro é estreito e de sección redonda.

O motivo representado recolle a figura dun xinete cabalgando sobre montura galopando á esquerda. O xinete leva un brazo tendido cara adiante suxeitando as bridas e o outro, estirado cara atrás, leva un pequeno escudo redondo. O gravado é moi superficial, o que demostra que o molde que se utilizou para gravar a pasta vítrea debía de estar moi gastado. O tema de xinetes á carreira, ben como cazadores ou como guerreiros, é habitual na glíptica romana.