Fragmento pertencente a unha a alfombra xeométrica do denominado “Mosaico dos cabalos” aparecido na rúa Doutor Castro, que pertence á Domus Oceani. Decoración xeométrica formada por filas de círculos e cadrados que se desenvolve a ambos os dous lados do emblema central. Esquema de círculos formado por unha trenza de dous cabos, polícroma, con teselas vermellas, ocres e grises, sobre fondo escuro. No centro do círculo un nó de Salomón polícromo, con alternancia de cores. Nos cadrados, un marco con filete de dentículos en catro teselas de cor azul escura. Dentro, outro cadrado con dobre listel bícromo, no centro do cal se inscribe un motivo de florecilla con cruz. Trátase dunha composición moi corrente na musivaria romana peninsular tardía.