Fragmento de cunco de costelas de forma hemiesférica, de vidro verde azulado. Recibe esta denominación pola súa característica decoración de molduras verticais a modo de costelas resaltadas en relevo, fabricadas a molde. Adoitan ser pezas monocromáticas en cor azul, cobalto e marrón.

Formarián parte da vaixela de mesa, cunha función polivalente, xa que estaba destinado a conter líquidos, alimentos semi-sólidos ou salsas. Constitúen, entre todos os tipos de vidro romano característico do século I d. C., o máis numeroso, xa que aparece non só en todas as provincias do Imperio senón tamén fóra dos seus límites.