Ola de corpo sinuoso e pé anular, con dúas asas de sección polilobulada. Decoración aplicada de cordóns plásticos con motivo serpentiforme no bandullo e as asas. Baixo o bordo, a decoración aplicada consiste nun anel dedado ondulado. A decoración complétase con motivos espatulados no ombreiro e a barriga.

A peza en cuestión é un produto híbrido, que responde técnica e formalmente ás técnicas romanas, pero cuxa decoración e produción son de carácter local. A orixinalidade desta peza reside non só no seu aspecto formal, que lembra certo tipo de cráteras clásicas, senón tamén na orixinalidade da súa decoración con figuracións plásticas serpentiformes, a semellanza doutras pezas pintadas do ámbito do noroeste. Todo iso fai que dita peza puidese ter unha función sacra, ritual ou litúrxica, sen que podamos precisar o culto ao que podía estar ligada.