Ola de cerámica común de cociña, con fondo plano, corpo globular e bordo exvasado oblicuo liso. Beizo apuntado e lixeiramente engrosado. Sen asas. Carece de decoración, aínda que puidese considerarse como único e elemental adorno a acanaladura perimetral situada baixo o bordo.

O seu uso na cociña é polivalente, pero sen dúbida era un recipiente empregado con frecuencia na cocción e preparación de alimentos, uso dominante que podía compaxinarse co de recipiente para almacenaxe. A esta función, podería engadírselle outra, xa que moitos destes exemplares foron utilizados como urnas cinerarias nas necrópoles de incineración da cidade.