Ola de forma globular e pé anular resaltado, pasta de cor negra ou gris oscuro, micácea, con decoración mixta de motivos espatulados, incisos e plásticos aplicados. A combinación das súas características formais e orixinal decoración, suxiren un uso non culinario.

A cerámica de tradición indíxena ou castrexa, está presente nos niveis máis antigos de Lucus Augusti, revelando a presenza de poboación autóctona desprazada á cidade e dunha produción local que segue os postulados indíxenas. Esta cerámica presenta unha gran variedade formal e de repertorios decorativos, entre os que cabe destacar principalmente a técnica do espatulado e o estampado. Secundariamente, tamén se emprega como recurso decorativo, os motivos plásticos aplicados (mamelóns, cordóns lisos, etc.) imitando outras manifestacións da plástica indíxena, preferentemente os repuxados metálicos.