Lucerna de canle ou Firmalampen, de perfil troncocónico, con restos de queimado e pico alongado con remate redondeado e base plana. Unha pronunciada moldura dende o disco prolóngase ata pechar o orificio de iluminación xerando a canle, neste caso aberta que lle dá o nome. Disco plano sen decorar, con asa perforada e base anular coa estampilla en relevo EX . OF / LV. / B.A. F. (EX OF (icina) LV (creti) B(racara A(ugusta) F(iglinis))

As lucernas de canle con marca de taller, caracterízanse pola simplicidade formal e sinxeleza decorativa, xa que o disco plano raramente está decorado. O arranque da produción prodúcese entre o 60 e 75 d.C., e acadan unha gran difusión. Neste caso trátase dunha produción bracarense de tipo local/rexional, da coñecida oficina local de Lucretius.