Lucerna de disco coa base lixeiramente cóncava con sinais da cremación. Orla decorada por catro grosas perlas a cada lado. Asa rota. Disco ancho e plano, decorado coa cabeza dun león escasamente recoñecíbel, co orificio de alimentación descentrado. Piqueira redondeada, onde apenas se aprecia a incisión en forma de corazón. Restos de engobe vermello.

A presenza deste tipo de lucernas como enxoval funerario nas necrópoles de incineración é habitual, xa que tiñan un significado simbólico, coa función de iluminar o camiño dos defuntos a través das tebras do máis aló.