Lucerna de disco, de corpo circular e bico (rostrum) redondo coa parte superior en forma de corazón. Orla redonda, decorada por tres liñas de perlas, separada do disco por unha estreita moldura. Disco con decoración inusual dun animal antropomórfico alado apoiado sobre dúas rodas radiadas, co orificio de alimentación colocado aos pés da figura. Base lixeiramente cóncava con sinais de cremación. A asa atópase fragmentada.

Polas características das pastas e pola súa rudeza técnica, parece tratarse dun obradoiro local/rexional. A presenza deste tipo de lucernas como enxoval funerario nas necrópoles de incineración é habitual, xa que tiñan un significado simbólico, coa función de iluminar o camiño dos defuntos a través das tebras do máis aló.