Conserva o arco-pé, a mortalla lateral e o apéndice caudal completos, co inicio do arco na cabeza. A ponte é de perfil semicircular e sección romboidal con resaltes laterais e na súa parte superior, crista percorrida por unha depresión central. Apéndice caudal rematado por un botón de forma cónica ou troncocónica.

Este tipo de fíbulas recibe a súa denominación do elemento máis característico da súa morfoloxía: o traveseiro (que neste caso non se conserva). Foron identificadas por Fortes (1905) e posteriormenete clasificadas por Ferreira da Silva (1986). Os elementos que definen este tipo de fíbula, ademais do traveseiro, son o arco semicircular, presentando na maioria das ocasións un resalte na súa parte superior. A cronoloxía destas fíbulas varía segundo os autores, que de forma xeral pódese situar entre os séculos III-I a.C.