Arco alongado, sen decoración, con resorte, posiblemente bilateral, formado por un arame enrolado en espiral. Descanso en forma de placa triangular. Este tipo de fíbula ten como trazo característico que o pé, a súa prolongación e a ponte únense, constituíndo un único elemento.

As fíbulas chamadas de La Tene, ou de apéndice caudal, son continuación no tempo, a partir de inicios do século V a. C., dos tipos de pé volto con botón terminal. As súas características principais evidéncianse na ponte curva e no pé coa súa prolongación elevada en apéndice caudal. Todo indica que o modelo deste tipo de fíbulas procede de Centroeuropa, sendo a conquista romana a que acentuará a súa difusión na Península, copiada e adaptada ás tradicións tecnolóxicas e os gustos estéticos locais. A súa presenza no contexto arqueolóxico de Lucus Augusti non deixa de ser meramente testemuñal, xa que apenas coñecemos exemplares deste tipo.