Cunco de perfil hemisférico da forma Drag. 37. Bordo recto ou lixeiramente inclinado cara ao interior. Parede de perfil curvo e fondo circular con pé de perfil triangular. A decoración, a molde, organízase en dous frisos, onde un motivo formado por tres círculos concéntricos segmentados repítese sen solución de continuidade, aínda que no superior divídese o espazo cun elemento vertical. A decoración de círculos enmárcase no terceiro estilo decorativo altoimperial establecido por Mezquíriz.

A Terra Sigillata Hispanica inicia a súa produción a mediados do século I d. C. En Lucus Augusti aparecen a case totalidade das formas producidas polas olerías peninsulares (pratos, cuncos, copas), destacando as formas e estilos decorativos dos obradoiros da área rioxana, en particular Tritium Magallum (Tricio). A forma 37 hispánica, como a súa homónima gálica, aparece nos mercados a partir do ano 70 d. C. e permanece ata o século IV. Con todo, esta peza aparece amortizada nun contexto arqueolóxico datado a principios do século II d. C.