Cunco de perfil carenado que corresponde á forma Drag. 29b. O bordo aparece decorado a roda, mentras que o resto do vaso presenta unha decoración a molde, en dúas bandas de friso continuo con motivos de grilandas enmarcadas por liñas de perlas.

A Terra Sigillata Gálica, procedente das olerías provinciais do sur da Galia (La Graufesenque, Montans), aparece a partir dos anos 25-30 d.C., substituíndo aos talleres itálicos. A vaixela gálica importada presente en Lucus Augusti redúcese practicamente aos pratos e copas, lisos ou decoradas a molde. Coñecemos algúns dos oleiros que asinan estes produtos como Albanus, Albinus, Licinus, Modestus, Famius.